Deur Liesel le Roux

DIE politieke toekoms van twee OD-raadslede van Oudtshoorn hang aan 'n draadjie nadat hulle die week die samewerkingsooreenkoms tussen die OD en die DA in die Wes-Kaap geïgnoreer het.

Mnre Gordon April en Jurie Harmse gaan dissiplinêr deur die OD verhoor word nadat hulle hul steun die afgelope week agter die ANC gegooi het. Onder-burgemeester April en Harmse het 'n dokument saam met plaaslike ANC- en NPP-lede onderteken waarin gevra is vir 'n dringende spesiale raadsvergadering Woensdag, waartydens beoog is om mosies van wantroue in die DA-burgemeester, me Diane de Jager, en die DA-speaker, mnr Pierre Nel, in te stel.

Die Groter Oudtshoorn-raad word deur 'n koalisie van die DA en OD geregeer, maar met die steun van April en Harmse sou die ANC saam met die NPP beheer oor die raad kon oorgeneem het.

Die OD-leierskap het egter mnr Sakkie Jenner, 'n OD-leier en die Wes-Kaapse minister van kulturele sake, sport en ontspanning, opdrag gegee om April en Harmse te stuit. Die balju is opdrag gegee om dringende dokumente aan hulle te bedien waarin hulle in kennis gestel is van die dissiplinêre verhore. Die twee sal volgens alle aanduidings uit die party geskors word.

Die res van die OD-lede en die DA-lede op Oudtshoorn staan egter bymekaar, het mnr Wessie van der Westhuizen, OD-raadslid, gister gesê.

Die aansoek vir die spesiale raadsvergadering is Maandag by Nel ingedien met die vereiste handtekeninge van 12 raadslede daarop asook die beoogde twee mosies van wantroue. Die dokumente is onderteken deur die agt ANC-raadslede, twee NPP-raadslede, April en Harmse.

Volgens Nel moet die vergadering kragens wet binne ses werksdae ná die aansoek plaasvind en is dit geskeduleer vir volgende Dinsdag om 15:00.

Die ANC het egter Dinsdag 'n prokureursbrief by Nel laat aflewer waarin aangedui is dat die party 'n interdik sou bekom om hom te dwing om die vergadering dringend te laat plaasvind. Die Hoorn kon nie gister vasstel of die ANC met die interdik wil voortgaan nie omdat die hoofsweep van die ANC, mnr Wilton Kawa, se selfoon by navrae dadelik op stempos oorgegaan het. Hy het ook nie op 'n boodskap gereageer nie.