 DIE Oudtshoorn Musiekvereniging en die Absa KKNK het 'n vleuelklavier aangekoop wat voortaan gebruik sal word vir musiekopvoerings van die KKNK, Klein Karoo Klassique en die Oudtshoorn Musiekvereniging. Tot dusver moes 'n klavier altyd teen hoë koste van elders gehuur word vir opvoerings. Die klavier is 'n tweedehandse semi-konsertmodel van Yamaha.
Volgens me Antoinette le Roux, sekretaresse van die Oudtshoorn Musiekvereniging, het die vereniging reeds donasies van R34 000 van inwoners en instansies/besighede ontvang, maar is dit nie naastenby genoeg om die Musiekvereniging se deel van die klavier te betaal nie. Die vereniging het verlede jaar 'n projek geloods waardeur inwoners aangemoedig word om een van die 80 note op die klavier te "koop" vir 'n borgskap van R1 000.
Die voorsitter van die vereniging, mnr Nic Barrow, het die week 'n versoek aan inwoners en besighede gerig om 'n finansiële bydrae te maak vir die klavier. Bydraers sal erkenning ontvang in Die Hoorn.
Die volgende inwoners en besighede het onlangs note gekoop: Jos en Leoni Smith, Louis van Rensburg, Gene Moulder, Kleinplaas Vakansieoord, Steers Fishaways, Kannaland ATKV, Leon Coetzee en Pick n Pay (twee note). Donasies is ook van mnr Louis van Rensburg en PNA ontvang.
Intussen kan klassieke musiekliefhebbers uitsien na twee konserte wat die Musiekvereniging vir vanjaar gereël het. Op Vrydagaand 27 Augustus tree Maria du Toit (klarinet) en Philippus Hugo (klavier) op, en op Woensdagaand 17 November Jerome Pernoo (tjello) en Jerome Ducros (klavier). Albei vertonings vind in Die Neelsie plaas.
Kaartjies vir die vertoning op 27 Augustus is vanaf Vrydag 30 Julie beskikbaar by Die Hoorn, die Barrow Trust en bestuurslede van die Musiekvereniging. |
