Deur Garnett Wicomb

DIE Eden Distriksmunisipaliteit het R140 000 bewillig vir die verwydering van riete en bosse by die inloop en langs die Calitzdorpdam.

Volgens mnr Skillie Pretorius van die Calitzdorp Besproeiingsraad wat Eden genader het om geld vir die skoonmaak te gee, voorsien die dam Calitzdorp van sy drinkwater en is die watervlak tans die laagste in baie jare.

Volgens mnr Macky van der Merwe, nog 'n lid van raad, is dit nou die ideale tyd om die riete en bosse te verwyder voordat dit dalk eersdaags reën.

Die onderburgemeester van Eden, mnr Anthony Ewerts, het met die oorhandiging van die tjek verlede week by die dam, wat sowat 10 km buite Calitzdorp geleë is, gesê die geld is om goeie rede aan 'n nie-regeringsorganisasie, Scardef (South Cape Rural Development Forum), gegee om te bestuur sodat daar nie vingers gewys kan word nie. Volgens hom is dit 'n werkskeppingsprojek vir 20 werklose inwoners van Calitzdorp.

"Baie inwoners van Calitzdorp besef nie werklik die waterprobleem nie. Hulle dink ons het genoeg water." Volgens Ewerts benodig die Calitzdorp Besproeiingsraad baie meer geld om indringerplante wat water opslurp, uit te roei.

Hy sê net soos Eden vir Mosselbaai, Sedgefield, George en Knysna finansieel ondersteun het, is besluit om dieselfde vir Calitzdorp te doen.

Hy het 'n beroep op die 20 werkloses gedoen om die geld wat hulle verdien "reg" te gebruik.

"Help by die huis om munisipale rekenings te betaal. Dit stel die Kannaland munisipaliteit in staat om dienste te lewer.

"Hierdie is deel van Eden se strewe om armoede in die streek te verlig. Dit is 'n klein begin wat groot kan word," het hy gesê.

Mnr Dean Claassen van Scardef het gesê hy glo die groep van 20 sal nie die Eden Distriksmunisipaliteit teleurstel nie.