Deur Garnett Wicomb

BRIDGTON het sy voorloperstatus in die Premierliga Top 8- kompetisie van die SWD Rugby Voetbalunie behou toe hy Blanco Saterdag in die Rec voor 'n groot skare met 31-9 geklop het.

Hoewel dit 'n beter vertoning was as die vorige week teen Progress lê harde werk voor indien die span vanjaar die Groot Uitdaagbeker wil wen.

Die rustydtelling was 14-9 in Bridgton se guns.

Bridgton kon veel verder gewen het indien die hanteerwerk op kritieke tye beter was. Verkeerde opsies het meer as een besliste drie verlore laat gaan.

Die tuisspan het eerste punte aangeteken toe Hadley Arries (regtervleuel) vroeg in die wedstryd 'n drie gaan druk het wat deur Erin Ewerts (losskakel) verdoel is.

Roderick January het die tweede drie gaan druk toe hy 'n skitterlopie langs die kantlyn af deur Wayne Jullies afgerond het. Ewerts was weer in die kol met die doelskop.

Ashwill Scheepers (senter) het Blanco tot rustyd in die prentjie gehou met drie strafdoele.

Bridgton het kort ná rustyd sy voorsprong gerek toe Charlie Ewerts (linkervleuel) 'n skitterdrie in die hoek gedruk het ná 'n mooi lopie deur Allen Meyer (senter). Daarna het Meyer ná 'n mooi beweging self gaan druk vir 'n bonuspunt.

Percival Dido, plaasvervangerskrumskakel, het kort voor die einde die tuisspan se vyfde drie gedruk ná 'n losskrum naby Blanco se doellyn.

Vir Bridgton het Brett Claassen (stut), Algernon Waarts (slot), Ronald Bratz (flank) en Kevin Pikaan (agtsteman en kaptein) voorlangs goed vertoon. Agterlangs het die senterpaar Craig Booysen en Meyer, Roderick January (skrumskakel) en Ewerts uitgeblink. Blanco se agttal het sy man veral in die eerste helfte goed gestaan met David Claassen (agtsteman) en Randall de Koker (slot) aan die voorpunt. • Bridgton se B-span het Blanco B in 'n spannende wedstryd met 22-20 geklop terwyl die C-span 'n maklike sege van 36-0 behaal het.