SWD se fietsryspan het met 'n puik vertoning in die vierde plek geëindig by die jaarlikse Eric van Enter-fietsrybyeenkoms wat van 7 tot 10 Julie by die Gariepdam plaasgevind het en waaraan spanne van 12 provinsies, insluitend Namibië, deelgeneem het.

Die SWD-span, wat verlede jaar die negende plek behaal het, het uit 30 ryers bestaan onder wie talle ontwikkelingsryers.

In die juniorafdeling het Ruan du Toit (17) geskiedenis gemaak deurdat hy die padwedren, heu-elklim en kermesse gewen het.

Volgens mnr Corné Botha, een van die spanbestuurders, was mnr Roger Bouton, hoof van ontwikkeling en transformasie by Fietsry SA vol lof vir die SWD se prestasies, optrede en voorkoms.

Botha het mnr Gert en me Sharan Loots van Oudtshoorn bedank vir hul finansiële bydrae vir die prysgeld.

Dit was die eerste keer dat die SWD interne prysgeld kon gee vir die beste ryer in elke ouderdomsgroep vir die toer, het Botha gesê.

Die beste ryers is soos volg:

Seuns: o.10 - Anrich Stander (1ste), Kerrigan Arries (2de); o.14 - Keeran Arries (1ste), Daniël Hodgson (2de); o.16 - André van Vuuren (1ste), Noor-Ru-Deen Lewis en Berthal Gertse (2de).

Meisies: o.14 - Shannique Loggenberg (1ste), Hanneke van Rooyen (2de); o.16 - Chimoné Lewis (1ste).

Junior Mans: Ruan du Toit (1ste), Warrick Waldeck (2de), Gerhard Loots (3de), Theo Moller (4de).

Junior Dames: Nadia van Greunen (1ste), Michelle van der Sandt (2de).

Jongste ontwikkelingsryers met meeste potensiaal: Anrich Stander en Shannique Loggenberg.

Jongste ryer op toer: Kerrigan Arries.