Terug na Vorige bladsy

Van kos tot ritte na Die Hel te kry

MEER AS 500 stalletjies is opgeslaan in afwagting vir die toeloop van mense wat vanjaar by die Absa KKNK verwag word.

Mnr. David Redmond bedryf al van die begin van die KKNK af ’n klerestalletjie. Redmond meen die sukses van verkope hang grootliks af van wanneer die fees plaasvind.

“Ons doen baie beter as die KKNK saam met Paasnaweek val.

“Verlede jaar het dit nie, en ons het nie so goed soos altyd gedoen nie.” Volgens hom is die uitleg van die stalletjies vanjaar baie beter.

Me. Mymoena Jardien, wat handgemaakte juweliersware verkoop, stem met hom saam. “Die uitleg was regtig swak, maar toe ons hierdie jaar hier aankom, het ons sommer gesien dinge lyk beter.”

Jardien bedryf al 13 jaar ’n stalletjie by die fees en volgens haar is hulle baie suksesvol. “ ’n Mens bou ’n verhouding met die mense. Almal is so vriendelik.”

Volgens haar het die organiseerders vanjaar baie moeite gedoen om goeie staanplek te gee aan die stalletjies wat al jare fees toe kom.

Daar is ook meer sitplek tussen die stalletjies. Mnr. Mamgouh Mostafa bedryf vanjaar die elfde keer sy Cairo Schwarma-stalletjie, en hy meen hy kan tot R200 000 wins maak as hy al sy goed verkoop.

“Maar ek gee nie om oor die geld nie, ek gee om vir die mense wat van oraloor komommy stalletjie te besoek.”

Mostafa staan ook bekend as “Mostafa, die mees bekende schwarma- sjef”.

“My stalletjie is die besigste kosstalletjie by die fees. Mense kom van heinde en verre om my kos te eet.”

Me. Olda Janse van Rensburg, die Absa KKNK se kliëntedienskoördineerder verantwoordelik vir die markte, sê daar gaan hierdie jaar ’n groot verskeidenheid stalletjies wees.

“Enigiets van kuns, goed vir mans, handgemaakte goed, T-hemde en kos.”

Volgens haar kos dit enigiets van R1 575 om ’n stalletjie te huur. Daar is selfs ’n stalletjie wat donkieritte na Die Hel verkoop. “Mensemóét die stalletjies kom besoek, dis ’n avontuur op sy eie.”

Skrywer: SARIETHA ENGELBRECHT

Terug na Vorige bladsy